“Универсиад” их наадмын бүсийн тэмцээнүүд эхэллээ

Монгол улсын Биеийн тамир, спортын тухай хуулийн 16.1 заалт, Засгийн газрын 2012 оны 8 дугаар сарын 1-ний өдрийн 262 дугаар тогтоолыг хэрэгжүүлэх оюутны дунд спортыг хөгжүүлэх, оюутан залуучуудын бие бялдарын бэлтгэлжилтийг сайжруулах, спортын ур чадварыг дээшлүүлэх зорилгоор Монголын оюутны спортын “Универсиад” гуравдугаар их наадам 2013 оны нэгдүгээр сараас эхлэн гурван үе шаттайгаар зохион байгуулагдаж байна. 

 
Их наадмын нийслэлийн бүсийн шатрын тэмцээн нэгдүгээр сарын 16-18-ны өдрүүдэд “Хос мастер” шатрын клуб дээр явагдаж нийслэлийн 18 их, дээд сургуулийн 60 гаруй оюутан тамирчид оролцож дүнгээ гаргалаа. Тэмцээний ерөнхий шүүгчээр Монголын шатрын холбооны шүүгч Б.Нямдаваа ажилласан юм.

Эрэгтэйчүүдээс МУИС-ийн оюутан, Спортын дэд мастер Б.Галмандах 6 оноогоор, МУИС-ийн оюутан, Спортын дэд мастер Б.Ариунбүүвэй 5,5 оноогоор, МҮДС-ийн оюутан Фиде мастер У.Насанжаргал 5,5 оноогоор харин эмэгтэйчүүдээс 6 оноогоор ТТДС-ийн оюутан, Фиде мастер У.Лхамсүрэн, 5,5 оноогоор Шихихутаг ДС-ийн оюутан ОУИМ Т.Батчимэг, 5 оноогоор БХИС-ийн оюутан, ОУМ Д.Янжиндулам нар эхний байруудад шалгарч ирэх хоёрдугаар сарын 4-6-ны өдрүүдэд болох МОСИН-ын шигшээ тэмцээнд оролцох эрхтэй боллоо. Багийн дүнгээр 1-р байрт МУИС /15,5/, 2-р байрт Техник технологийн ДС /14,5/, 3-р байрт БХИС /14/ тус тус шалгарсан байна.  

Универсиад их наадам нь аэробек, бокс, волейбол, гандбол, заалны хөл бөмбөг, жудо, модон бөмбөг, сагсан бөмбөг, спорт аялал, хөнгөн атлетик, тэшүүр, цана, чөлөөт бөх, шатар, ширээний теннис зэрэг спортын 15 төрлөөр явагдах юм. Наадмын анхан шатны тэмцээн нь Монгол улсын бүх их, дээд сургууль, коллежийн хэмжээнд зохион байгуулагдсан юм. Хоёрдугаар шат нь нийслэл, баруун, хангайн, төвийн, зүүн гэсэн таван бүсүүдэд волейбол, гандбол, заалны хөл бөмбөг, сагсан бөмбөг, шатар, ширээний теннис  зэрэг зургаан төрлөөр явагдаж эдгээр бүсээс шалгарсан баг тамирчид нь их наадмын шигшээ тэмцээнд оролцох болзлыг хангана.  

Хуваарийн дагуу их наадмын тэшүүрийн тэмцээн нь нэгдүгээр сарын 26-27-ны өдрүүдэд явагдах юм. 

ЗОХИОН БАЙГУУЛАХ ХОРОО